تجربة‬ امتحان الانجلش لمصر للطيران للضيافه الجويه فى الجامعه الامريكية 2014

الامتحان بيكون فى الجامعة الامريكية وهو مش تويفل هو تحديد مستوى عادى .
مدته : ساعتين ونصف
الاسئلة : 3 اجزاء

1- استماع : مدته 30 دقيقة ... بتسمع محادثة وبعدين يديك وقت تجاوب على الاسئلة وهكذا.
2- قراءة : مدته ساعة .. عبارة عن 8 قطع وكل قطعة عليها شوية اسئلة والقطع بتدرج فى الصعوبة وفى طولها بمعنى ... ان اول واحدة سطرين وعليها سؤال والاخيرة قطعة كبيرة عليها 6 اسئلة.
3- كتابة : مدته ساعة بردو .... وهما 3 اسئلة

- اوصف الصورة : التى امامك فى 40 : 50 كلمة
( عيد ميلاد جدة وحواليها احفادها واولادها وزوجها و قدامهم تورتة وهى بتقرأ كرت هدية وكل واحد بيقدم هديه ) ... السؤال كدة بالنص انتو ادربو عليه عشان ميخدش وقت منكم هناك.
- رد على خطاب : فيه خطاب وانتو هتردو عليه فى 100 كلمة تقريبا .
- بيقولك فى 100 : 150 كلمة اكتب رأيك عن استخدام كاميرا الموبايل .. فيه ناس بيشوفوا انها مفيدة جدا عشان بنخلد ذكرياتنا و...... وناس تانية بيشوفوا انها بتقضى على الخصوصية وليها اضرار كتيرة ... هما عايزنكو تكتبو رأيكم فى الموضوع.
- .................................................
بعد كدة فيه امتحان شفوى بسيط جدا مدته 5: 10 دقائق وهدفه يعرفو نطقكم مستواه ايه ؟؟
وهو دردشة بسيطة وسهل جدا متقلقوش منه واللى بيعملوها لكم بنانيت زى العسل .
.............................................
بعد أسبوع الدرجات بتروح شركة مصر للطيران وهما بيتصلو بالناس عشان يروحو يعملوا انترفيو هناك .وبتكون قدام لجنة وبيدولكم ورقة انجليزى بتقروها وبيسألو شوية اسئلة عليها وبيقولو انه سهل ولخر حاجة اختبار ال Fitness
………………………………………………….
لازم تروحو شركة مصر للطيران عشان تعرفوا ميعاد امتحانكم
خلاص عرفتو الميعاد بتروحو الجامعة الامريكية ومعاكم ايه ؟؟؟؟
قلم رصاص + استيكة + مسطرة
بتروحو ازاى ؟؟
عارفين شارع محمد محمود اللى فيه هارديز بتدخلو فيه وتمشو على طول و تانى شارع على ايدكم اليمين تدخلوه .... تمشوا شوية هتلاقوا باب احمر هو تانى باب على يمينكم تدخلوا وهناك هيتأكد من اسمكو وبعدين هتروحوا الاستعلامات وهى بعد الكافيتريا وبعدين هتدفعوا الفلوس بتاعة الامتحان 185 ج .
وهيقولوكم مكان الامتحان