تجربه عن امتحان الانجليزي لمصر للطيران للضيافه الجويه 

أولا بالنسبة لل Listening (هو أصعب حاجة في الامتحان بس مش صعب متقلقوش هو بس عايز تركيز جاامد ) وأهم حاجة تسمع كويس اللي بيتقال مش تركز بس في التفاصيل اللي في النص وتسيب المضمون العام

.. يعني مثلا جه في مرة سأل عن الهدف الرئيسي من الديالوج او المونولوج ايا كان .. كنت عايزة أءكد كمان على ان السؤال اللي يعدي منك (سواء مسمعتوش كويس أو مش عارفه) متبصلوش نهائي ..لولسه باقيلك وقت كفاية من ال20 ثانية بتوع إجابة كل سؤال ممكن تفكر فيه وممكن برده تكتب جمبه أي كلمه تفكرك بالسؤال بتاعه عشان لما ترجعله تاني .. لكن برده متفضلش نفكر فيه لحد ما السؤال التاني يبدأ لأن غالبا لما بيضيع منك أول كام كلمة ممكن تتشتت و بتلحق هتلاقي نفسك مش مركز كويس ومش عارف تمسك الكلام منين  فحاول تسيب ثانيتين او 3 تاخد نفسك وتستعد للسؤال اللي بعده
كمان في حاجة غريبة شوية حصلت معايا .. حاول متحطش ورقة الإجابة على الشيت اللي فيه ال choices .. لأن انا كنت ساندة دا فوق دا والصفحة مثلا فيها 4 أسئلة ف أنا كنت بسمع السؤال الأول والتاني وأجاوبهم وعيني تروح على الصفحة اللي بعدها (لأني مش شايفة باقي الأسئلة اللي مستخبية تحت ورقة الإجابة) فكنت بحط إجابة السؤال في مكان سؤال تاني خالص ولما أخدت بالي من اللخبطة دي اتخضيت وضيعت مني السؤال اللي انا فيه واالحركة دي حصلت كذا مرة .. ومحدش يقول غباء صدقوني من التوتر بيحصل أي حاجة .. ف ريلاكس خاااالص الموضوع بسيط مش مستاهل قلق .. ومحدش يقف ادامو سؤال فيتربك ويتعقد .. خااالص ده طبيعي على فكرة انك تغلط شوية في ال Listening هتتعوض في الwriting & reading لأنهم سهلين جدااااا
اللي انا فكراه في ال Listening :
-كان فيه حوار عبارة عن واحد ومراته بيكلمو جارتهم الجديدة الي راحو يزوروها (اعتقد للمساعدة) وبيسألكو عن سبب الزيارة .. كمان مرات الراجل هتقول انها بتعرف تعمل أكلة حلوة ولما يحصل حاجة معينة هتعزمها عليها ( هيسألك في أي مناسبة هتعزمها ) والجارة الجديدة دي هتعد تتكلم عن جوزها اللي اتطلقت منه وتقريبا ليه بعدو عن بعض ( هيسأل كلامها الأساسي كان عن ايه . علاقتهم ببعض ولا مقارنة بين جوزها وبين جوز الست التانية ولا .....) انا الحقيقة ماخدتش بالي
-حوار تاني سهل كدا في الأول بين واحدة في الشارع بتسأل واحدة تانية عن مكان محطة الاتوبيس والتانية هتقولها هتمشي وهتحودي اول شمال بعد السوبر ماركت وبعدين شمال تاني .. وهتعزم عليها ب فكة للأتوبيس ,هتقولها لأ شكرا .. بس
-كان فيه كمان محاضرة عن الفن الغربي والفن الصيني تقريبا مقارنة عن أوجه الشبه والاختلاف وفي أول سؤال هيجيب كلمة كدة غريبة هيقولك دي كان قصده بيها ايه ؟ رسم ولا نحت ولا ... انا بصراحة معرفتهاش ( هدور عليها غي جوجل لو لقيتها هقولكو) كمان هيتكلم عن الأدوات اللي بتستخدم في الفن الصيني والغربي .. وكان بيقول ان الفن الصيني مكنش بيستخدم الحبر على عكس الفن الغربي وقال كل فن ببستخدم أدوات ايه وازاي .. ركزو فيها هشان بردو هيسألكو ايه الاداة اللي مش بيستخدمها الفن الغربي .. وبيسأل كمان ايه المضمون من المحاضرة دي مقارنة ولا حاجات تانية .. وفي سؤال في الاخر بيسأل فيه عن طريقة الرسم في الفن الغربي تقريبا وفي الاختيارات في Dipping the brush in the ink .. و dropping the brush in the ink و اختيارين تانيين مش فكراهم فركزو هوا بيقول أي واحدة فيهم .. وبيسأل في حتة في اخر المحاضرة المدرس قالهم هيشرح ايه المرة اللي جية
-في كمان ديالوج بين واحدة ودكتور تجميل وهوا بيقولها ان مش المفروض أي حد يعمل عمليات تجميل وخلاص الا الحالات الصعبة وان هما مش المفروض يمشو ورا كل واحد عايز عندو هواجس ويعمل تجميل وخلاص وان الجمال هو الجمال الداخلي .. وهي بتقولو عن الناس اللي وزنها زيادة اووي قالها ان Liposuction اللي هو شفط الدهون بيعملو للناس اللي محتاجاه او حالتها صعبة اوي .. وبيسأل كام سؤال في التفاصيل اللي قلتها دي وحاجات تانية مش فكراها
-في كمان واحدة بتتكلم زي تنبيه او اعلان حاجة زي كدة عن حاجة تجارية مش فاكرة بالظبط كان ايه بس اللي فيه يعني انها بتقول اللي هيتدفع 70,000 واللي هيتأخر عن الدفع هيدفع 90,000 ف خدو بالكو في سؤال بيسأل عن اللي هيتدفع في حالة عند الالتزام بالدفع في الموعد (طبعا الإجابة هتبقى 90,000) وهيسألك سؤال هيقولك ايه معنى كلمة compromise دي معناها settlement يعني تسوية او التوصل لحل وسط ..
-واحد كمان سهل اوي كان بيتكلم عن بيتو بيوصفو وبيقول انهم سكنو هناك من 6 سنين ( وبيسألك كام سنة) وبيقول محتويات بيتهم كام غرفة وحمام وكدة (وبيسأل الحمامات في الدور الكام .. هي في الأول والتاني)

طبعا في تفاصيل وأسئلة أكتر أنا مش فكراهاا .. أنا حاولت بس على أد مافتكرت اني اقولكو على التفاصيل الصغيرة اللي في النص والاجابات اللي مش متأكدة منها مرضتش اجاوب عليها .. حاولو تركزو بقى قي الباقي ومتنسوش زي ماقلت تبقو عارفين ايه المجمل من الحوار او الهدف الرئيسي بتاعه عشان بيسأل السؤال ده في أغلب قطع ال listening

بالنسبة لل Reading بردو بيتدرج من السهل للصعب بس حتى الصعب بتاعه قطعة واحدة بس و هاقولكو على اللي فيها ,, بس عايزة أقول ان ال Listening وال Reading في شيت واحد يعني بعد ما ال listening يخلص ممكن ترجع تبص على الأسئلة اللي سبتها وتحلها او تعدلها .. بس الموضوع ده مياخدش اكتر من 5 دقايق عشان وقت ال Reading على أده بالضبببببط
-مش هتلاقو أي صعوبة غير في قطعة(دي اللي اخدت معايا وقت على ما فهمتها بتتكلم عن حاجة زي مؤتمر كده كان فيه وجهتين نظر لفريقين ,, الأول بيقول ان التعليم لازم يرتبط بالفايدة ويعود علي الاقتصاد بالنفع .. اما الجروب التاني بيقول ان التعليم مهم في حد ذاته كتعليم او ثقافة بسسسس واللي بيروي الحكاية محايد Neutral او شايف ان كل رأي من دول بيوصل للتاني.. وكمان بيسأل على معنى كلمة Catalizing في القطعة دي معناها Stimulating يعني بتحفز
- في واحد كمان بيتكلم عن الاطفال العباقرة وان مهما الآباء عملو عشان يخلو ولادهم كدة بس مش بيحصل يعني .. وان الأبحاث العلمية متوصلتش لحاجة في الموضوع ده
باقي القطع سهلة جداااااا

بالنسبة لل Writing :
-جالي بردو الصورة بتاعة أطفال بتلعب في حديقة على الطريق بيلعبو بالكورة وبلالين ونط الحبل وشد الحبل و عجلة
-الرسالة جالي ان انا مدير شركة اكسسوارات عريبات وواحد بيعرض عليا جهاز جديد وهو منبه العربية اللي بالريموت وبيعمل صوت عشان اعرف مكان العربية وانه مزود بخاصية امان تمنع تشغيل العربية من أي حد تاني غير صاحبها وعايزني ارد عليه ( انا عشان ازود في الكلام مدحت في المنتجات بتاعتهم وانه شرف لينا التعامل معاكو وان انتو سمعتكو حلوة وفي الاخر قلت اني أكون شكورة او بعتلي تفاصيل اكتر عن المنتج وتقولي سعره كام لو طلبت عدد كبير)
- اخر حاجة المقال جالي بتاع وجهتين النظر في ان الواحد يكمل تعليمه في الجامعة ولا يوقف بعد الثانوية ويشتغل بحجة ان دلوقتي مفيش فرص عمل للخريجين