امتحان اللغه الانجليزيه الخاص بمصر للطيران في الجامعه الامريكيه

 و كان بنفس النظام القديم و الامتحان كان شكله كالاتي :

بدايه الامتحان كانت Oral مع دكاتره من الجامعه الامريكيه و كان عباره عن شويه دردشه بينك و بينهم و اسئله عاديه و متنوعه و من ضمن الاسئله اللي سالوها للناس :

1) اسمك يعني ايه و بتحب اسمك ؟
2) انت اخترت الكليه اللي انت درست فيها و لا الكليه هي اللي اختارتك ؟
3) بتحب المكان اللي انت ساكن فيه ؟ و لو عايز تعيش في مكان تاني تختار تروح فين ؟
4) ايه هي مميزات و عيوب شخصيتك ؟
5) بتحب ايه من انواع المزيكا ؟
6) بتروح بيتك ازاي يعني باي مواصله ؟
7) عايز ترجع تعيش في حقبه الستينات و لا تفضل عايش في الالفيه ؟
8) لو اتجوزت في المستقبل ايه البلد الي انت بتحب تعيش فيها ؟ و ايه اشهر حاجه في البلد دي ؟
9) ايه نقطه قوتك و نقطه ضعفك ؟
10)كنت بتشتغل ايه قبل كده ؟ و ليه سبت شغلك القديم ؟
11) عايز ليه تشتفل كمضيف / مضيفه جويه ؟
12) ايه رايك في البلد " مصر " حتكون ازاي في سنه 2025 ؟ و ليه ؟

بعد كده في Listening الامتحان بيكون سهل و صوت واضح في الاول و لكن بعد كده بتبدا درجه الصعوبه بتزيد و الصوت عايز تركيز منك شويه علشان تقدر تسمعه و كمان الكلام بيكون بسرعه في الاخر علشان الحوار اللي انت بتسمعه Conversation بيكبر و محتاجه منك تركيز اكتر و ال Listening كان على شكل حوارات بين الناس Dialog و بعد كل حوار فيهم عليه اسئله Choose و طبعا من السهل للصعب.بعد كده يجي امتحان Reading و كان عباره عن تمن فقرات 8 Passages و كل فقره عليها اسئله من خلال قريتك ليها و فهمك و طبعا من السهل ثم الصعب بس الفقرات مش معقده. اخر حاجه في الامتحان هو Writing و الامتحان ده كان مقسم ل 3 اجزاء ، في الاول بيجبلك صوره و عايز منك توصفها و الصوره كانت عباره عن مجموعه اطفال بتلعب في الحديقه كره و بلالين و حبل و في الصوره فيها شمس و شجر اما في الجزء التاني بيطلب منك تعمل Reply على Letter و موضوع Letter كان عباره عن انك مدير قسم المبيعات و انك انت حققت Target كويس و حتاخد عليه Bonus و في الجزء الاخير من Writing كان عباره عن Essay يعني تكتب مقال و مقال جه عن Role Model و طلب منك ايه الافضل في وجه نظرك انك تختار مثل اعلى واحد في كل حاجه و لا تاخد من كل شخصيه حاجه معينه كويسه فيه .

هو ده كان شكل الامتحان اللي الناس امتحنتو النهارده و الجامعه الامريكيه قالت للناس ان النتيجه حتكون بعد 4 اسابيع في مصر للطيران و الامتحانات حتخلص على يوم 24 نوفمبر 2014.  و بالنجاح و التوفيق 

أعجبني